الرئيسية
دخلت سعاد بيت البكا وهي مكشكشة بالدهب ... كل الدقات في القويشات والخنقات في السلاسل.. والشنقات في الحلق ... الحنّة مرسومة.. الحنّانة استوحت الرسمة من لوحة دافنيشي العشاء الأخير... بالرغم من اعتراض سعاد وانشاء الله ما يبقى آخر عشا...التوب توتال أصلي مطرَّز عن أحسن مطرازاتية في السودان.. تطريزوكلف ما يفوق المليون بحساب الناس المشلهتين وملاليم بحساب عواطف ورصيفاتها من بنات حواء ... دخلت سعاد وشايلة منديل ورق في يدها تقشقش في عيوناتا برّاحة خايفة علي المكياج بالرغم من الميت خالها..شقيق أمها.... رقد مستشفى سبعة أيام بلياليها في غيبوبة.... سعاد انتهزت الفرصة واستعدت للبكا من بدري اتحننت واتجيهت .. وما ممكن تجي بكا خالها وهي مبشتنة وغبشا...وفي يوم الحنّة كانت تدعو ربنا" انشا الله يا خالي ما تموت قبال ما حنتي دي تشيل سمح"... حمام مغربي وحمام زيت ... وصنفرة وشي... طالبت زوجها بتلاتة تياب جديدة تذمّر الزوج وزمجر " يا سعاد قبل اسبوع أنا مشتري ليكي توبين " قالت وهي تدعي الدلال الما خايل فيها..." توبين شنو يعني؟ لي سعودتك! مرتك! حبيبتك!".... نزل الحنك السنين على فؤاد الزوج برداً وسلاماً...وجاب لو رخية وقال" التياب بجيبن علا تاني للسنة الجاية ما بشتري ليك شي دلقان... سمح؟" ... ابتسمت سعاد وهي ترمش في دلال بسرعة أربعة واربعين رمشة في الدقيقة... " سمح يا حمودي... تاني ما دايرة شي".... حمودي هو دلع محمد زوجها ..تناديه به في ساعات الحوجة وما عدا ذلك فتناديه بمحمد وأحيان أُمحمد مع نهرة لو نهرتها لأسد ضرغام ارتعدت فرائصه خوفاً وخلعة وهجيمة... دخلت بيت البكا، بيت خالها المتوفي وهي تبكي وتعدد في مآثر المتوفي ... وتمشي وتجي فوق النسوان في حركة استعراضية ... وأخيراً بعد ما فترت ...جابت الكرسي وقعدت جنب خشم باب الحوش حيث تدخل وفود المعزيات ... خلفت كراع فوق كراع، جرّت التوب كاشفة عن جزء من الساق حيث نهاية لوحة رسمة الحنّة..والمرا الما تتلفت علي الحنة تدقشها عواطف برجلها وتلتفت المرا غصباً عنها وتشوف الكراع والحنة وآثار الحمام المغربي.... فتعتذر سعاد وهي تفتعل أن العبرة خانقاها " معليش.... يا بت أُمي.... باقي خالي دا موجعني وجع شديد .. ومخلبطة وما عارفة كراعي وين ماشة؟"....جهزو الفطور ودعو عواطف فقالت بإعلى صوت وهي تكشف عن راسها المزيَّت حديثاً ويدها ذات الغوايش ورقبتها ذات السلاسل... وأخذت تهز " أنا بعد خالي الأكِل ما دايراهو ما دايراهو..." باءت كل المحاولات بالفشل وكل ما كثر عدد المحاولات لسعاد أن تفطر زادت فرحتها وابتهجاها إنو في عدد كبير إتفرج فيها... وهي متمسكة بموقفها وحردانة الفطور وهي تتشبث بخشم الباب ..مرّت من عندها واحدها شايله صينية الفطور دقشتها سعاد بكراعها حيث أنها تعودت أن تدقش كل من مرَّ من عندها لافتة نظره إليها... دقشت المرا الشايلة الصينية وتفقد المرا توازنها وتقع فوق سعاد بالصينية ويندفق المُلاح وكل ما في الصيينة فوق سعاد ... وتتملي من راسا لي كرعيها.... قفل الباب:- وَالمسَاءُ الذِي تَهَادَى إِلينَا ثُمَّ أصغَى وَالحُبُّ في مُقلَتينَا لسُؤَالٍ عَنِ الهَوَى وَجَوَابٍ وَحَدِيثٍٍ يَذُوبُ في شَفَتينَا
دخول
المواضيع الأخيرة
أفضل 10 فاتحي مواضيع
أفضل 10 أعضاء في هذا الشهر
| لا يوجد مستخدم |
أفضل 10 أعضاء في هذا الأسبوع
| لا يوجد مستخدم |
3 مشترك
بكا خال سعاد
طارق احمد- نائب المشرف العام
- تاريخ التسجيل : 12/02/2010
عدد الرسائل : 152
الرازي- المستشار الثقافي
- تاريخ التسجيل : 19/02/2010
عدد الرسائل : 163
هذا هو واقع بكياتنا ... والغريبة يا شيخ طارق النسوان الواحدة منهن لو كان البكا الساعة واحدة بالليل والظلام ما تشوف القدامك تعرف الجات والما جات ... كانه الواحدة منهن عندها رادار ... وحتى البكا بقى خشم بيوت ... وفي الاعوام القادمة اتوقع تكون في حجوزات للبكيات في فنادق فايف استار ... نسال الله العافية وربنا يشفى سعاد ومثيلاتها ...
نفيسه بابكر- صلوعابي ممتاز
- تاريخ التسجيل : 06/02/2010
عدد الرسائل : 36
والله داء فعلا حال البكاء السوداني في مجتمعناوداء اخر الزمن ربنا يسترنا بالمناسبه في اصناف للي الحنه عند الحنانات حنته المستشفي
حنت العزاءوربنا يستر ما يعملوليناء كده في العزاءبتاعنا
حنت العزاءوربنا يستر ما يعملوليناء كده في العزاءبتاعنا
» اليقين والتوكل علي الله
» شركة تشطيبات فى المهندسين (شركة تراست جروب للتشطيبات )
» شركة تصميم ديكورات (شركة تراست جروب للتشطيبات والديكورات)
» افضل شركة تشطيب (شركة تراست جروب للتشطيبات والديكورات )
» صور ديكورات(شركة تراست جروب للتشطيبات والديكورات 37623103 )
» شركات الديكور فى مصر(شركة تراست جروب للتشطيبات والديكورات )
» وتتوالى نجاحات المكملات الغذائيـــة لمراكـــز الهاشـــمى للا
» البعرف ده ليه جائزة
» ملف صوتي - مرثية هاشم - إلقاء معز عوض
» قلوب لاتعرف النسيان
» التوافق بين العقل والقلب
» فضل صيام يوم عاشوراء ( العاشر من محرم)
» أي العبارات التالية تؤلمك
» رســـــالة إلى عاق الـــوالـــديــن