من طرف طارق احمد الأحد يونيو 06, 2010 1:49 am
المكان: إحدى بوادي السودان الزمان: ستينات القرن الفائت الأبطال: عشَّة... عيّانة بتايفويئد... أخوان عشَّة الخمسة " النمور اللابدة فوق الخُشَّة".. عبد التام التمرجي.... العنوان : الحقنة المشاهدين: مجموعة من نسوان ورجال وأطفال قبيلة ناس عشَّة الفصل الأول والأخير:- ترقد عشَّة وهي تويوِيب " تقول ووب علي بين الفينة والأخرى".... جوا بيت من القش.... تقعد أمَّها عن راسا.. وكل ما تقول عشَّة ووب علي تقول لها أمها" بسم الله فوقك.. تبري من الووب" أخوان عشَّة خارج البيت في الفسحة القدامو ... كل واحد فيهم شايل عكازو وسكينو في ضراعو ويبرم شنبو بالتناوب مع إخوته الأربعة يعني كل ما يخلص واحد من برم شنبو يستلم التاني الوردية.. ويقعد يبرم شنبو .. يجي التمرجي عبد التام .. لابس بنطلون أسود وقميص أبيض مفتوق بالجنبة... وشايل شنطة فيها كل معدات التمرجنة... يحاول الدخول على عشة... يجري قدامو أخوها الكبير ويطرد النسوان المعا عشَّة ويطلب من أمو (تغتي) عشَّة سمح بالتوب... (تغتيها) كلَّها ما تخلِّي فيها طرف مارق.. يدخل التمرجي يحاول أن يرفع التوب من وشي عشَّ.. يمد إيدو ليتحسس درجة الحرارة... ينهرو أخو عشة الكبير" يا زول هووووي ما تكشف البت .... إن بقى عندك دكترة سوِّيها وهي (متغتية) أوعك تكفشها "... يمد التمرجي إيدو فوق التوب يهز راسو استنكاراً.. مبدياً أن درجة الحرارة وصلت درجة الغليان... يفتح التمرجي الشنطة يمرق حقنة يعبي الحقنة دواء يتحرك من الراس جهة الكرعين وهو يقول لاخو عشَّة" الحقنة دي حارة شديد ولازم عشَّة تاخدها ما في عضل الإيد... تاخدها هناك"....وهو يشير الي هناك...تحمر عيون أخو عشة ويعقد حواجبيهو ويصر صرة قوية ويعاين للتمرجي عين شديدة ويقول لو وهو يعضعض شلاليفو" أها.. قمنا لي قلة أدب التمرجية... حرَّم أختي ما تاخد الحقنة هناك.... أمرق أمشي معاي أشاور أخواني" يجر الأخو الكبير التمرجي من إيدو ويمرقو ويجتمع الإخوة الخمسة مع التمرجي... ويحكي لهم الأخو الكبير ما قاله التمرجي ... يمسك واحد منهم عكازو ويقوم علي التمرجي وهو يحلف أن يكسر راسو.. يهدوهو ويقعد... يقول أحد الإخوة" نحن ما عندنا حريم يتكشفو علي رجال وكمان إنت داير تكشفها .. عاين وين؟آآآآآآآخ.... حرّم تعاين ساكت للبكان داك بعينك علا سكيني دي تاباك...أفو... أنا أخوكي يا عشَّة"... يفكر أحد الإخوة ويقول لي التمرجي" يا الحكيم مافي أيك يا طريقة الحقنة دي تديها في أي بكان انشاء الله تطعن المخدة الراقدة فوقها عشَّة؟....واللا أقول لك أديني ليها أنا دا ؟ وكمان إن بقيت أنا ما نافع ما منكن تفقع فتيل الإبرة دا في موية ونديهو ليها تشربو......" يحاول التمرجي أن يفسر لهم أن الدواء ما ينفع الاّ يدوهو حقنة وفي البكان الحددو هو... يعاين الإخوة لبعض ويقول واحد فيهم" أأأأأ.. التمرجي حرّم إت مو جايي لي علاج.... إت جاااي لغرضاً آخر.....ونضمك دا أعوج .. وبي تاباهو" يبتعد الإخوة من التمرجي ويتناقشون قال أحدهم وهو في غاية الزعل " مرض عشَّة النخليهو نحن في التمرجي دا الجايينا عند أهلنا وداير يكشف عرضنا.. شفتوه مُصر كيفن يدي عشَّة الحقنة ... نقتلو وندفنو هنا .." يقول أعقل واحد فيهم" لا لا القتل ما بقينا لو...ندقو ساكت عشان تاني ما يقل أدبو علي زول... وتاني ما يدي ليهو مرة حقنة إن بقت دايرة تموت" يرجع الإخوة وهم عازمون علي دق التمرجي.. ثم يدقو التمرجي ويفلقوهو ... ويدخلو علي أم عشَّة ويقو ليها كبيرهم" أمي بلي القرض ومسِّحي عشَّة سمح بيهو وباكر دي تصبح طيبة .... أخير من نبقى في رقبة ونقتل لنا زول" قفل الباب:- لا شوفتن تبل الشوق ولا ردن يطمن أريتك تبقى طيب إنت أنا البي كلَّو هيَّن
الرئيسية
» اليقين والتوكل علي الله
» شركة تشطيبات فى المهندسين (شركة تراست جروب للتشطيبات )
» شركة تصميم ديكورات (شركة تراست جروب للتشطيبات والديكورات)
» افضل شركة تشطيب (شركة تراست جروب للتشطيبات والديكورات )
» صور ديكورات(شركة تراست جروب للتشطيبات والديكورات 37623103 )
» شركات الديكور فى مصر(شركة تراست جروب للتشطيبات والديكورات )
» وتتوالى نجاحات المكملات الغذائيـــة لمراكـــز الهاشـــمى للا
» البعرف ده ليه جائزة
» ملف صوتي - مرثية هاشم - إلقاء معز عوض
» قلوب لاتعرف النسيان
» التوافق بين العقل والقلب
» فضل صيام يوم عاشوراء ( العاشر من محرم)
» أي العبارات التالية تؤلمك
» رســـــالة إلى عاق الـــوالـــديــن