من طرف طارق احمد الأحد يونيو 06, 2010 12:38 am
النظر لي محاسن المرأة.. وذكرها ووصفها وتشبيهها بحاجة جميلة.. الغزل كلمات ومفردات وحركات تتغير بتغير الزمان والمكان…. والبئية…. ناس الشمالية ممكن يتغزلو في واحدة يقولوا ليها يا عجوة يا قندلية يا ود لقاي… يا خدرا قش.. يا لوبيا من غير ما يقول يا لوبيا عفن لانو ح يكون طلع زيتا… وح تزعل منو يقول لوبيا ويسكت… كان على زمانا الغزل يتم بالحنحنة… والحنحنة رمزها احم…. وربما تكون اتنين احم ورا بعض وممكن تكون إحم قصير التيلة واحم طويل التيلة. كأن تجر اححححححم… والحنحنة لها عدة مواضع حنحنة للفت النظر.. وحنحنة غزلية دي بتاعت المشاغلة وحنحنة للانتباه والحنحنة المرضية وهي كتيرة عند اصحاب النزلة.. والحنحنة الشرانية للتحدي يكون في زول انت مشاكلو تقول ليهو احم ويتلفت تروح صاري ليهو وتجر فيهو نور طويل وقد يبادلك نور بنور او يرخي هو وشداعتو وشدة خوفو منك.. ما يهمنا هنا الحنحنة الغزلية وهي اجملهن والطفهن… قلت ايضا كنا نستعمل السكسكة كان نقول "سكسكسك" فتلتفت البلومة.. فننظر اليها باعجاب مع ابتسامة ربما متبوعة بكلمة "احي انا" وهي كانت كودا معترف به عند الشباب والشابات.. وقد يشطط بعضهم فيغمز للبلومة او يرفرف اي يرفع حواجبه عدة مرات سريعا وبصورة مطردة.. فتخجل البولمة وتدنقر او تصر او تقول ليهو "دم" اما الصيع فيلتقطون كلمة دم ويردونها للبولمة مما يثير خجلها أكتر.. الدنقير والصرة يعتمدان على الضكر المشاغل فإن كانت الفتاة معجبة به ربما تبادله ابتسامة بابتسامة ثم تدنقر او تدنقر وبس!...كان احد زملاء المراهقة مجنونا بالمشاغلة ولكنه كان عنيفا وكم مرة نبهناهو انو طريقتو في المشاغلة دي يوم ح تجيبها ضقلها يكركب… كان يستعمل الحجارة في لفت الفتاة ما يشوف واحدة ماشة قدامو الا ويدنقر ويشيل حجر ويجدعها بيهو.. واذكر مرة انه فلع احداهن وهي من بنات الحي الذي نسكن فيهو مما جعلنا نتدخل وحلينا الاشكال.. والحمد لله الفلعة جات بسيطة …ومن غير دم… ومن غير ان يسمع اخوان البلومة المفلوقة ويصرو علي الاخد بالتار… وكان فينا من يعتقد انه شاعر ويتغزل في محبوبته وانا اول واحد قايل نفسو شاعر…. حكمة ربنا ليوم الليلة قايل اني شاعر بالرغم من تدخل الاجاويد واهل الخير عشان ارحم الشعر واخليهو لكن برضو مصر إني شاعر… وبعد كدي حقو يخلوني لأنو يا متا أنا يا مات الشعر… وكان يغيظني التوم ود رحمة وهو ينافسني ويزاحمني في كتابة الشعر.. واذكر قصيدته التي جارا بها قصيدتي باظ بورتسودان والتي يقول مطلعها: باظ بورصودان اب كراسي وهيطة يا اللحمر لونك وعندك زيّطة لشنو تشيل حبيب قلبي؟ وتخلي دموعي جارية طيطة .. فأصر التوم ان يسوي قصيدة تجاريها للوري اللبيض وهو اللوري البيمشي اللبيض وادعى ان اللوري شال حبيبتو ومشى اللبيض.. لكن وحات الله كضاب لا عندو حبيبة مشت اللبيض ولا حاجة بس داير يكاويني انا… كان مطلع قصيدته: لوري اللبيض اب كفرات غُلاد يا الهوستن هوستن السجم والرماد لشنو تشيل حبيب قلبي؟ وتخلي دموعي جارية غُلاد …. بالله مش حاجة تغيظ؟.. سرقة عينك عينك قفل الباب: ألا تتقيـن الله فيمـن قتلـتـه فأمسى إليكم خاشعـاً يتضـرّعُ فإن يكُ جثمـاني بأرض سواك فإن فـؤادي عندك الدهر أجمع
الرئيسية
» اليقين والتوكل علي الله
» شركة تشطيبات فى المهندسين (شركة تراست جروب للتشطيبات )
» شركة تصميم ديكورات (شركة تراست جروب للتشطيبات والديكورات)
» افضل شركة تشطيب (شركة تراست جروب للتشطيبات والديكورات )
» صور ديكورات(شركة تراست جروب للتشطيبات والديكورات 37623103 )
» شركات الديكور فى مصر(شركة تراست جروب للتشطيبات والديكورات )
» وتتوالى نجاحات المكملات الغذائيـــة لمراكـــز الهاشـــمى للا
» البعرف ده ليه جائزة
» ملف صوتي - مرثية هاشم - إلقاء معز عوض
» قلوب لاتعرف النسيان
» التوافق بين العقل والقلب
» فضل صيام يوم عاشوراء ( العاشر من محرم)
» أي العبارات التالية تؤلمك
» رســـــالة إلى عاق الـــوالـــديــن