رساله للمغتربين

قبـل السفر


قبال تمرْقو من الوطن
وتموت جواكم سُمرَتو
قبال تأشرو للخروج
وتذيدو جرحو وحُرقََتو
قبال تبيعوه للمحن
وتخلُّو في عز كُربَتو
قبال تسلِّمو للصراع
والفرقه
والخوف
والسطو
قبال يبيعوه للغريب
وتضيع نضارتو وهيبتو
قبال يقسْمو حِتتْ حِتتْ
ويفقد تواريخ عِزتو
قبال تفوت شمسو وتغيب
ويفرض علي الناس عتْمتُو
قبال تسافرو من الوطن
وقبال يسافر حتُّو هو ،،
ما تنسو إنو كسير جناح
ومحتاج شديد لي فتيتو
هو أكان عليو
لا يفوتو زول
لا تفضي في يوم حِتتُّو
تفضل ولادو معاو دوام
وترجع سريع
كل الطيور الفاتتو
كل خانه حتسدوها في يره البلد ،
محتاجه شان يملابا بيكم فجَّتو
وطناً رعاكم كُت صغار
ما قصَّر أداكن حنان
وكل البفيض عن حوجتو
داير وكت تصمُت ايديو
ويخونو جواهو النضِم ،
تبقولو فخرو وحجَّتو
وهسع بعد ما كبرتو فيو
وسويتو من أنفاسو ريش ،
دايرين تطيرو خلاص بعيد
دايرين تخلوه للغريب
لآمن يموت بي حسرتو !
الغربه ما بتبنيلا بيت
بالعكسِ هي البتشتّتو
والغربه ما بتصنع رجُل
بالعكسِ هي البتكلفتو
بتهينو ما بتحترمو قط
بِدُّقو ... هي البِتكفِّتو
ياها البِتكتل فيو وفاو
ياها البتسلب إلفتو
الغربه بتقص الضهر
بتقسِّى قلب المغترب
بتنسِِّى حنيةْ الأهل
بطردو من جوف ملَّتو
وكمين نفر
تابع سرابا
ولا وصل
لا تاني عاد لي سكَّتو
زيف العمارات الهناك
أحسن عليو طين حلَّتو
وأحسن كتير
الزول يموت
جوه الوطن بي ذلَّتو ،
من لو يعيش
إنسان عزيز في غربَتُو ...

















15\2\2007م