المغداد سليمان يرثي الوالدة خديجة عبدالعاطي

رثاء الوالدة خديجة عبدالعاطي
من طرف الاخ/ المغداد سليمان محمد أحمد - الشكابة

تقيل وزنك على الناس البعرفو مقامك
ولي الرحم القريب بالخير بصل إسهامك
من قوم الجهل ماسمعنا زولا لامك
زي عد القروش الناس تعدو كلامك

خديجة الخير رحيلك نار جمر حراقة
قديمة الدنيا يا ام الجميع فراقة
الطيبة المأصلة انت من عشاقة
فراقك مننا خلا الدموع تتلاقى

ساعياه المحنة وماسكة فيها شديد
محياك نورو ساطع زي صباح العيد
رحيلك يا الأصيلة مكتوب حقيقة أكيد
القدر المسطر منو مابنحيد

فاقداك القبائل جملة كافة عموم
ويبكوك الكبار وحتى الصغير مهموم
كريمة وبت أصول تعزم على المعدوم
زي ضل الدليب الناس تجيها تنوم

بت ودالرزم سيد النحاس القحة
الواجب البشرف منو مابتتنحة
تعبو عليك كثير في السفر والدحة
لكن القروش مابتجيب الصحة

مرتا تكوي في الفكك المورم ظاهر
وعند واجب الفريق بتشيلوا ليلا ساهر
فراقك بهدل القلب المصمم وقاهر
رثاك بالحروف بدورلو شاعر ماهر

خديجة في البلد باقية الأصل والساس
وفيك الكثير بشهدوبوا الناس
في الواجبات معروفة شايلة الكأس
رحيلك مننا حدثاًً يشطب الرأس

البادراب نعوك أهل المسيد واللوح
فرشو حزانا باكين بالدموع والنوح
متلك في البشر نادر عدم في السوح
المال والدهب مابيفدن الروح

غرارة العبوس دار النعيم الزايل
مي دوامة ياسند الضعيف المايل
أبواتك كرام ليها تاريخ طايل
طيبة عشرة وارثاها وشموخ ونفايل

مي قريزن حريم زعالة دون أسباب
عن قولة سلام ترجاك عند الباب
لي الصبي والكبير مهتمة عاملة حساب
حليلك بالكثير ست الرجاء الماخاب

خبرك حز في نفوسنا وكثير هزانا
رأس الدولة ذاتو في الفقد عزانا
حسن محجوب معاهو الهيئة بي أركانا
عزو وقيّلو ولي المافي سدو الخانة

الدقة القديمة الفي الحريم إنعدمت
جميع الناس بشوفها على رحيلها إنصدمت
كم خيم حزن والهموم إتردمت
صومعة القيم ياحليلة ما إنهدمت

مرت ضيفان تمام في السنسن الكالحة
معروف من قديم هاشة وبشوشة وفالحة
تركة جدود صوفية طاهرة وصالحة
لي زيارة الرسول عبرو البحار المالحة

عابدين شايفو من كثر الألم بتحسر
في دوامة حزن لا نضم لا فسر
حضروك الجميع مافي زولا قصر
فقدك ألم الفارس قدر ما أجسر

فرقة كبيرة حاصلة أصلو مابتنسدة
وذكراك فينا باقية مهما تطول المدة
محاسنك بالألوف حاشا مابتنعدة
ضياء فاقدك كثير لافطر لا اتغدة

خبرك طاف على القرى والبلد عماها
أزعج كل زول والقلوب هزاها
ياست الاصول البي العرض تتباها
المعدودة كملت مافي زول بحجاها

فيك عرضا وسيع أصلو مابتعبر
سليلة الاتقياء واللي فارغة مابتتخبر
نفسها طيبة خلقة أصلو مابتتكبر
الفاقدك محال من الحزن إتصبر

بكوك رتب كبار وليهم وظائف عالية
عزّو كمال هناك في أما عزيزة وغالية
حقيقة الدنيا زايلة ومعروف مظاهرة بالية
ويا الضل الرهين عز الشموس القالية

يارب العباد ياخالق الانسان
اكرم منزلا واتولاها بالاحسان
في الفردوس هناك تتبوأ أعلى مكان
في الجنة ام نعيم مابين سرور وأمان

الرحمة تغشاك وتشملن أجدادك
وكل السابقين واقرباك واندادك
جميع خير الجنان يصبح غذاك وزادك
ربنا يرحمك والبركة في اولادك

الشاعر

المغداد سليمان محمد أحمد
الشكـــــــــــــــابة