الرئيسية
وطن مجروح وقلب مفتوح للشاعر هاشم صديق امد الله في عمره ومتعه بالصحة والعافية
ما قاصدِك
ولا جابني الدَرِب
لكني بس ضليت
..........
مرقت
أكوس علي نفسي
بعد ما شِبت
واتْفَتْفًت
واتْدقّيت
...........
مرقت
أكوس علي نفسي
قفلت ورايا
باب البيت
لا ودّعتَ
لا اتْلفّت
ولا حنيت
ولا وصيت
بس قبّلت
بي وشي
علي نصل الجَرِح
عضيت
...........
لا الشارع
هو ده الشارع
تقول ما قمت
فوق رملو
وعلي طوبو
مشيت
شبّيت
ولا ساسقت
فوق همو
ولا كاتلت
فوق جرحو
ولا اتكرفست
في حُضنو
واتمسّحت
واتْدَفّيت
..........
لا أهلي
هو ديل أهلي
ولا الحِلة
هي دي الحِلة
ولا نفسي
هي ذات نفسي
ولا ده البيت
هو ذاتو البيت
............
ءاتْليسّ
قَلُب نفاج
اتبدّل
هسيس النيم
وجافا الغيم
اتحنضل
خبيز العيد
مات بالسكته
شوق الصاج.
.............
اتباقص
حنين الشوق
اتكتّف
وكان معتوق
غَرْس الخوه
اتكسّر
نِشِف يا يُمه
واتحسّر
لا مطراً
ولا ( ماروق )
.............
آ آ آه يُمه
آ آ آه يابا
صباحكم خير
كلْ غرساً
سقيتوا هوي
( بعد لبّن
غشاهو الطير )
............
آ آ آه ... يا يُمه
كيف الحال ؟!
بعد قمحك
نجض آمال
وطال نخلك
وقف مختال
أصابو مَحَل
وكوّع ومال
اتحتحت
حنين الحِنه
والياسمينة
والليمونه
غُصن العَمه
ضُل الخال
.............
آ آ آه يا با
اتشقق
هوي الجالوص
وفي غار
( الزمان الحار )
اتْفتْفَت
بصيص فانوس
............
شوفي الدنيا
ما ها الدنيا
كضابه
ومُرتابه
وربرابه
سِقِف مايل
وماكلو السوس
غناها خَدَر
رماد وكَدَر
نشاز في ( قوس )
هواها الغش
ومليون وش
كمان
( غَلفَا
وشايله الموس )
.................
................
ما قاصدك
ولا جابني الدَرِب
لكني بس ضليت
............
ما بْعَرْفك
عشان أقدر
أقول مشتاق
عشان ألقاك
وأقول حنّيت
............
ما ركب الخيال
قطَرِك
ولا باح البحر
سِرّك
لا رسم الأمل
صُدفه
لا نسج الجنون
شُرفه
ولا طار الشِعِر
جنحين
خطّ لقاكي
يوم في بيت
.............
مرقت أكوس
علي نفسي
بعد ما تُبت
من وهمي
ومن شبق الحنين
عديت
بعد ما مات
هوي النفاج
واتْقطّع
لحم ضهري
من الأنصال
وبالكرباج
بعد عِشق
اللهيب الزيت
بَعَد ما اتْحتَ
شوقنا رماد
بعد ما بقينا
( غير ) وبعاد
بعد مسح الجفا
الأبعاد
وصار
لطمي الجروح
أمواج
.............
............
مرقت أكوس
علي نفسي
لا دي الحِلّه
ذات الحِلّه
لا دي الناس
هي ذاتا الناس .
في شيتاً
اتخْنق فينا
برك بي طولو
في الأنفاس
مشنوقة العيون
في الغيب
سبيب الهِمّة
صابو الشيب
نشفان القلُب
والريق .
محنوق العشم
في الضيق
غبار ( أمشير )
سكت في الجيب
ما جاب الأنين
رحمه
ولا زار الأمل
زحمه
وكُلْ حضناً
تلمو غريب .
...........
مرقت أكوس
علي نفسي
علي قَد ابرة
في ضيقاً
وقف في الوش
علي صِدقاً
بعد صاقر
عيونّا الغش
علي زرعاً
بهيج فرعو
تِقِل بي ثمرو
مال للحش
عُلي صِدْقاً
في غار بحراً
نبيل سرو
بات مصرور
وصار مدخور
عشان يكتب
خلاصنا دَغَش
علي ثغراً
تصدّق ضحكو
من قلبو
( يمازح
حزنك الوافر )
ويخط أحلامو
في باكر
يِنَقرش في الحنايا
ويهش
.............
.............
مرقت
أكوس علي نفسي
بعد ما عزّ
برش اللمّه
في رمضان
بعد ما اتحنضلوا
العيدين
واتكتف وصال
الضحكه والايدين
واتقلّب
هوي الأخوان .
بعد ما بقينا
( ناس ) ميتين
بعد ما بقينا
بس كيمان .
كلامنا كضب
حنينّا نِضِب
جروحنا لِعِب
لقانا مَطَب
هسيسنا تَعَب
زمنّا كعب .
.............
آ آ آه يا يمه
وا حُرقة شقايْ
وأساي
علي دي الدنيا
( بت الكلب ).
علي مرجيحة
الأزمان
علي هَمَلَة
حنايا الالفة
والانسان
علي وهَدَة
مضايْق الرحله
والقصة
( علي التاريخ )
( علي التجريح )
علي كضبة عبور
الغَصة
والامكان
................
................
ما قاصدك
ولا جابني الدَرِب
لكني بس ضليت
مرقت
أكوس علي نفسي
بعد ما شِبت
واتْفَتْفَت
واتْدقيت
مرقت أكوس
علي نفسي
قفلت ورايا
باب البيت
............
لا حلمي
هو ذات حلمي
لا دي ( ام دُر )
هي ذات ( ام دُر )
كلْ شيتاَ
غِشاها كُتُر .
ولا وطني
هو ذات وطني
تقول ما مُتّ
في ريدو
ولا شبّيت
وقُمت ربيت .
.............
ده كان
( وطناً بسُر العين )
حرق أورادو
طيش ( السادة )
و ( الخُلفا )
و ( العسكر )
وناس ( هتلر )
و ( ابو الحصين )
وداس قلبو
وبرك فيهو
الزمان الشين
.............
آ آ آه .... يُمه
آ آ آه .... يابا
حليل اسم
الشَرف والزين
حليل معني ( المثَل )
يابا
بعد ضبحوهو
بالسكين
حليل السبحه
و ( الأذكار )
وكت كان ( الذِكِر )
لي الله
للغفار
ما للسُلطه
و ( الدولار )
و ( للتخزين ) .
.............
حليل وكت
الزمان ( مُسْلم )
لا كضاب
ولا نصاب
ولا مرتاب
ولا تدجين
ولا تلجين
.............
آ آ آه .... يمه
آ آ آه .... يابا
ده كان وطناً
طويل فارع
بسُر العين
............
آ آ آه يا وطني
يا بَعضي
ويا ( كُلي )
............
يا شمسي
ويا ضُلي .
يا مكلوم
ويا مظلوم
غريب انت
جريح وفصيح
عبوس ومليح
ضحوك وحزين
..............
( ربيعك ) ياوطن
مكتوب
علي ساق الِشدَر
في الغيب
خلاصك يا وطن
منصوب
علي خاطِر
غشاهو الشيب
وبطنك طامّي
يوماتي
من الوَدَرَة
وعناكْب الجيب
ومن كضب الكبار
وصَغَار
ومن عَصْرَة
مغَسْة العيب .
...............
..............
ما قاصدك
ولا جابني الدَرِب
لكني بس ضليت
............
مرقت
أكوس علي نفسي
بعد ( ضاقت )
شرايين قلبي
و ( انسدّت )
و ( راجين مبضع
الجراح )
تقول ما كفايه
ضيق الدنيا
يا قلبي
ولا عُمراً
مشيتو جراح
تقول ما شلت
جرح الناس
وما كاتلت
شان الصباح
غريب يا قلبي
رَتْرَتّ وفترتَ
ما كمْلتّ
ليل الرحله
شان توصل
شمس ... وصباح
وشان ترتاح
..........
مرقت
أكوس علي نفسي
بعد سَرَقَت
هوايا المغسه
واتمزّق
وصال الونسه
واتليسّ
قَلُب نفاج
بعد ما عزّ
لمْ حُضناً
وصار وش الزمن
كضّاب
بعد ماتوا
الحُنان وقُراب
بعد صنقعنا
( للأبراج )
بعد ما انْسدّ
باب الرحمة
وسط الزحمة
للمحتاج
بعد هرولنا
لما فترنا
بين السادة
والخُلفَا
وبين ساقْية
( مشير )
و ( اب عاج )
بعد ساسقنا
بين الحسرة
والتأزيم
والتفزيم
و ( المونتاج)
...........
بعد ( سَنسر )
فصول ( عُمرك )
مقص الطاغية
والارهاب
وكال ليكا
الغرق أمواج
............
............
ما قاصدِك
ولا جابني الدَرِب
لكني بس ضليت
...........
مرقت
أكوس علي نفسي
بعد ما شِبْتَ
واتْفَتْفَتَ
واتْدَقيت
مرقت
ما اتلفت
ما ودعت
ما وصيت
...........
لا نفسي
هي ذات نفسي
ولا أهلي
هو ديل أهلي
ولا ده البيت
هو ذاتو البيت
............
قلِب مفتوح
( وصل )
لي ( مبضع الجراح )
خلي عزاكا
يا قلبي
- الصِبِح وطني -
بس كاتلتَ
شان الصاح .
عَضّي أساكْ
كان أصبح
جراح في جراح
لا تشكي
ولا تبكي
الزمان الراح
..............
عضّي أساكْ
عضّي أساك
عضّي أساك
............
متين تِنْجمَ
متين تِرتَاح ؟!!
» اليقين والتوكل علي الله
» شركة تشطيبات فى المهندسين (شركة تراست جروب للتشطيبات )
» شركة تصميم ديكورات (شركة تراست جروب للتشطيبات والديكورات)
» افضل شركة تشطيب (شركة تراست جروب للتشطيبات والديكورات )
» صور ديكورات(شركة تراست جروب للتشطيبات والديكورات 37623103 )
» شركات الديكور فى مصر(شركة تراست جروب للتشطيبات والديكورات )
» وتتوالى نجاحات المكملات الغذائيـــة لمراكـــز الهاشـــمى للا
» البعرف ده ليه جائزة
» ملف صوتي - مرثية هاشم - إلقاء معز عوض
» قلوب لاتعرف النسيان
» التوافق بين العقل والقلب
» فضل صيام يوم عاشوراء ( العاشر من محرم)
» أي العبارات التالية تؤلمك
» رســـــالة إلى عاق الـــوالـــديــن