ص ل و ع ا ب

غايتو فى مرة بتذكر بعد قلعات
طالع نازل شفت بياض
بياض فى بياض
أتارى ديل مدرستين
نصاح وشداد
واحدة بنوها ست وخمسين
والتانية أظن كم كم سبعين
وقالو بنوها بالايدين
وقالو بنوها ناس طيبين
أى والله ناس طيبين
لا بكلو ولا بملو
سطرو أسامى فى التاريخ
ونالو شهادة ناس كادحين
شوية شوية جيت مارى
لقيت مركز
شفت بناهو لا بنهز ولا بتلز
مركز صحى للمرضى
وفيه أوضة للتحصين
وجيت للحلة من قدام
شفت الناس هناك طيبين
وجيت فى خلوة الباشاب
لقيت الناس هناك فى الباب
أول كلمة قالو حباب
عقبت الحلة من غادى
نزلت برضو فى الوادى
فى نصو هناك لقيت ميدان
وجنبو الدونكى برضو ملان
شوية شوية دى العمدان
وبرضو جزارة للميدوب
وجنبها نادى للشبان
شوية كمان
تلقوا بيان
عرفتو منو000الشيخ سلمان
ود العوضية الشيخ سلمان
عليهو الحلة شاهدة عيان
وهادى الوادى وادى الشيخ
وهادى الحلة هيل الشيخ
وشايلة اسمه وادى الشيخ
شفتو الحلة وادى الشيخ
فيها رجال 0ياما كانو كانو زمان
وياما هسه لينا ضمان
فيها الترزى ود حمدان
وسبحة كبيرة كل كلاما يا حنان ويا منان
وكتها داك قم طاير محلق فوق
وشفت الحلة من بى فوق
وشفت الناس هناك القوق
ومن بى فوق
شفت النيل وشفت الخور وديك نخلات
ترس منصور0 ترس عثمان والجيرات
وحيت للحلة بالقلعات
ونص الحلة بير النور لقيت أصحاب
دحين يا جنى بلادك انت مش صلوعاب[i]

لك التحية الاخ الشاعر ابو عبيدة الفاضل حقيقة قصيدة رائعة جدا ومزيد من التقدم

مشكور يا ابوعبيدة على الابداع امتعتنا بالقصيدة الرائعة والله يديك العافية

قصيدة رائعة يا ابوعبيدة تؤكد انك شاعر مميز وكلمات رصينة ومعبرة لك الشكر وصلوعابنا سواك ما هوينا

شكرا شكرا الاخ ابوعبيدة علي هذه القصيدة الرائعة ومزيدا من القصائد الجميلة عن الوطن الصغير الصلوعاب

شكرا الشاعر الفذ الرائع ابوعبيده وهاكذا هم ابناء الصلوعاب فى كل المحافل الرياضيه والاجتماعيه والثقافيه